ألبانيا

"HS" INC. KUNDËR B.M DHE PERSON I TRETË AUTORITETI I KOMUNIKIMEVE ELEKTRONIKE DHE POSTARE DHE DREJTORIA E PERGJITHSHME E PATENTAVE DHE MARKAVE, VENDIMI nr. 727, datë 27.04.2017 PËR NDALIMIN E PERDORIMIT TË EMRIT TË DOMAINIT "HERTZ.AL" DHE TRANSFERIMIN E KËTIJ DOMAIN-I NË EMËR TË PALËS PADITËSE.

Objekti i padisë:

Ndalimin e përdorimit të emrit të domainit "hertz.al";
Transferimin e këtij domain-i, në emër të palës paditëse, shoqërisë “HS”, Inc
Publikimin e vendimit përfundimtar të Gjykatës në median publike me shpenzimet e personit që ka kryer shkeljen, në mënyrën e parashikuar nga Gjykata.

Gjyqtari: M.O

Fjalët kyç:

Markë, e drejtë ekskluzive, domain, ngjashmëri, element dallues dhe dominant, ndalim përdorimi, trasferim domaini.

Ligji dhe dispozitat ligjore përkatëse: Nenet 16, 42 e vijues të Aneksit 1/C të marrëveshjes “Mbi aspektet tregtare të të drejtave të pronësisë intelektuale” (TRIPS),; neni 6 bis i Konventës së Parisit “Për mbrojtjen e pronësisë industriale”,; nenet 153 e vijues, 334, pikat “ç” dhe “d” të Kodit të Procedurës Civile, nenet 638 dhe 639 të Kodit Civil, ; nenet 4 pika 17, 154, 156, 167 e vijues të ligjit Nr.9947, datë 07.07.2008 "Mbi pronësinë industriale", i ndryshuar, n; Nenet 4, 18, 18.2, të Rregullores Nr.2, datë 21.02.2008 “Për regjistrimin dhe administrimin e emrave të domain- ve nën Al dhe nën domain-et .gov.al, .mil.al, .edu.al, .com.al, .org.al dhe .net.al", i ndryshuar.

Faktet kryesore:

Pala paditëse, “H.S” Inc, pjesë e grupit “Hertz Global Holding”, është një shoqëri tregtare e regjistruar sipas legjislacionit amerikan, që vepron në fushën e dhënies me qira të makinave dhe pajisjeve, në Evropë e në botë.

Në bazë të pikës 5, të nenit 154, të ligjit Nr.9947, datë 07.07.2008 “Për pronësinë industriale”, në Drejtorinë e Përgjithshme të Patentave dhe Markave, pala paditëse ka regjistruar 2 marka: markën me numër regjistrimi 9194, datë 11.12.2002, me të drejtë mbrojtje deri në datë 11.06.2022, me logon e përfaqësimit “HERTZ” dhe markën me numër regjistrimi 9773, datë 08.12.2003, me të drejtë mbrojtje deri në datë 01.07.2022, me emërtimin “HERTZ”, të dyja me objekt listën e mallrave dhe shërbimeve me numrat 39, 38 dhe 41, sipas klasifikimit ndërkombëtar të Nice-s, ku përfshihen mjete transporti me qira dhe shërbime qiradhënie.

Nga pala e paditur B.M, është regjistruar pranë regjistrit tregtar, “B.M” person fizik tregtar, me NUIS K********I, me objekt të veprimtarisë dhënie mjetesh me qira. Më datë 17.02.2010, pranë Autoritetit të Komunikimeve Elektronike dhe Postare, nga një subjekt i emërtuar “V. C. R.”, me K********I, me administrator të paditurin B.M, është regjistruar domain-i .hertz.al.

Pala paditëse pretendon se regjistrimi i domain-it nga pala e paditur, përbën cënim të pronësisë mbi markat e saj të regjistruara, ndaj i është drejtuar Gjykatës së Rrethit Gjyqësor Tiranë me padinë objekt gjykimi.

Vendimi:

Gjatë shqyrtimit gjyqësor të çështjes në shkallën e parë të gjykimit u vendos që padia të pranohet pasi bazuar në ngjashmërinë e mallrave që ofrohen nën markat e regjistruara nga pala paditëse dhe ato të shfaqura në website-in nën domain name www.hertz.al, bazuar në natyrën e tyre, kategorinë e përdoruesve të këtyre mallrave, mënyrën e përdorimit të tyre dhe ngjashmërinë vizuale dhe orale si dhe kuptimore, ato janë identike, shkaktojnë jo vetëm konfuzion tek publiku, por dhe identifikojnë domain-in me markën e regjistruar në pronësi të palës paditëse dhe si rrjedhim është e dukshme mundësia e bashkëlidhjes së shenjës (hertz) me këtë markë tregtare, pavarësisht nga kategoria e konsumatorit. Regjistrimi i domain-it name ".hertz.al", të regjistruar nga pala e paditur pranë Autoritetit të Komunikimeve Elektronike dhe Postare përbën cenim të të drejtave të pronësisë industriale të palës paditëse. Gjykata ka vendosur: detyrimin e palës së paditur të ndalojë përdorimin e emrit të domain-it të regjistruar; të kryhej transferimin e detyrueshëm të tij, në emër të palës paditëse dhe të publikojë me shpenzimet e tij, shkurtimin e vendimit, në gazetën me tirazhin më të madh në vend, në çastin e ekzekutimit të këtij vendimi, brenda 15 ditëve nga data që vendimi do të marrë formë të prerë.

Arsyetimi i gjykatës:

Gjatë gjykimit të çështjes, gjykata në lidhje me parashikimet ligjore në përputhje me rastin konkret, vëren se bazuar në nenin 140 të ligjit Nr.9947, datë 07.07.2008 "Për Pronësinë Industriale", i ndryshuar, me markë do të kuptohet çdo shenjë ose kombinim shenjash, që paraqitet grafikisht dhe që shërben për të dalluar mallrat apo shërbimet e një personi fizik ose juridik, ne mbrojtje te konsumatorit dhe sjelljes së tij në treg. Konsumatori identifikon mallin apo shërbimin dhe ka sigurinë që ai të jetë prodhuar nën kontrollin e pronarit të markës, i cili do të mbajë dhe përgjegjësi për cilësinë e tyre. Marka, krahas vlerës informuese për konsumatorin, i vjen në ndihmë pronarëve të markave për të parandaluar veprimet e konkurrencës së pandershme. Bazuar në nenin 156 të ligjit parashikohet e drejta ekskluzive e pronarit të markës së regjistruar, në përdorimin e saj dhe të ndalojë personat e tretë ta përdorin atë, gjatë ushtrimit të veprimtarisë së tyre tregtare, pa autorizimin e tij.

Ndërsa, "domain name", përdoren në lidhje me adresat e internetit në Rrjetin e Mbarë Botës (World Wide Web). Tri shkronjat e para (www) përdoren si shkurtesë e „( gorld Wide Web) kurse emri është emri i domenit. Pjesa kryesore e emrit të domenit, ne fjalorin e teknologjisë informative njihet si “gTLD” dhe pjesa e fundit “.al” njihet si “ccTLD” dhe përdoret për të identifikuar një shtet të caktuar, siç është në rastin konkret Shqipëria.

Autoriteti përgjegjës për regjistrimin dhe administrimin e emrave të domain-eve nen .al, në bazë të ligjit nr.9918, datë 19.05.2009 "Për komunikimet elektronike në Republikën e Shqipërisë", i ndryshuar, është Autoriteti i Komunikimeve Elektronike dhe Postare, i cili vepron në zbatim të rregullores Nr.02, datë 21.02.2008 "Për regjistrimin dhe administrimin e emrave të domain-eve nen .al dhe nën domain-et .gov.al, .mil.al, .edu.al, .com.al, .org.al dhe .net.al".

Sipas nenit 18.1 të Rregullores, aplikuesi ka të drejtë të zgjedhë si emër domain-i çdo lloj emri që dëshiron, përveç atyre emrave që bëjnë pjesë në listën e emrave të ndaluar apo të rezervuar dhe të atyre që janë regjistruar më parë, duke marrë përsipër të gjitha përgjegjësitë që mund të rrjedhin nga kjo zgjedhje. Sipas nenit 18.2 gërma d) i), aplikuesi duhet të zgjedhë një emër, i cili duhet të moscënojë të drejtat që rrjedhin nga pronësia industriale.

Gjykata shprehet se, nga interpretimi i kësaj dispozite, del e qartë që emrat e domenit janë të regjistruar sipas mënyrës “i pari që vjen” dhe pronari i një marke tregtare nuk mund të regjistrojë emrin e doman-it, sipas markës tregtare, nëse dikush tjetër e ka regjistruar më parë.

Në këtë kuadër ligjor, është bërë i mundur regjistrimi fillestar i domain name “hertz.al” nga pala e paditur B.M, në cilësinë e administratorit të një subjekti të quajtur “V. C. R.”, i cili gjatë këtij gjykimi nuk u provua që ekziston apo ka ekzistuar i regjistruar në organet kompetente fakt i cili pohohet edhe nga pala e paditur B.M.

Përkundrazi, me NIPT-in e deklaruar për regjistrimin e domain name hertz.al nga pala e paditur B.M rezulton i regjistruar në Qendrën Kombëtare të Biznesit personi fizik tregtar B.M.

Nga provat shkresore të shqyrtuara gjatë gjykimit provohet se, pala paditëse i ka kërkuar palës së paditur B.M, person fizik tregtar, zgjidhjen e këtij konflikti jashtëgjyqësisht dhe në mungesë të zgjidhjes së saj i është drejtuar Gjykatës, referuar nenit 638 të Kodit Civil dhe pikës 1 dhe 2 të nenit 184 të ligjit Nr.9947, datë 07.07.2008 "Për pronësinë industriale", i ndryshuar.

Gjykata arrin në përfundimin se pala e paditur B.M në cilësinë e personit fizik tregtar, gëzon legjitimimin pasiv në lidhje me objektin dhe shkakun ligjor të kësaj padie.

Vetë pala e paditur B.M. me anë të prapësimeve të tij pohon dhe mbron të drejtën e regjistrimit dhe të posedimit të domain name “hertz.al”, në emër të tij. Ndërkohë, gjykata vlerëson se, pretendimet janë në interpretim të gabuar të dispozitave ligjore mbi pronësisë industriale, pasi emërtimi tregtar i subjektit dhe marka janë dy koncepte të ndryshme juridike dhe tregtare.

Gjykata çmon se për të vërejtur se të drejtat e markave të regjistruar nga pala paditëse shoqëria “H.S.” Inc. cënohen nga regjistrimi i paautorizuar prej saj, i domain name .hertz.al, është e rëndësishme të vlerësohet ngjashmëria e mallrave apo shërbimeve që ofrohen në aspekt të natyrës së tyre, përdoruesve të tyre, mënyrës së përdorimit si dhe nëse ato kanë të njëjtin destinacion ekonomik. Lidhur me ngjashmërinë merret në konsideratë ngjashmëria vizuale, orale dhe kuptimore dhe veçanërisht elementët e dallueshëm dhe dominantë të markës.

Elementi dominant i markës së regjistruar nga pala paditëse është fjala dhe figura hertz, e cila është njëkohësisht dhe element dallues dhe i domain name .hertz.al dhe i website përkatës.

Gjykata vlerëson se, bazuar në ngjashmërinë e mallrave që ofrohen nën markat e regjistruara nga pala paditëse dhe ato të shfaqura në website-in nën domain name www.hertz.al, bazuar në natyrën e tyre, kategorinë e përdoruesve të këtyre mallrave, mënyrën e përdorimit të tyre dhe ngjashmërinë vizuale dhe orale si dhe kuptimore, ato janë identike, shkaktojnë jo vetëm konfuzion tek publiku, por dhe identifikojnë domain-in me markën e regjistruar në pronësi të palës paditëse dhe si rrjedhim është e dukshme mundësia e bashkëlidhjes së shenjës (hertz) me këtë markë tregtare, pavarësisht nga kategoria e konsumatorit. Ndaj, sipas gjykatës cënohen të drejtat e pronësisë industriale të palës paditëse.

Në përputhje me mbrojtjen e të drejtave të palës paditëse mbi markat tregtare të regjistruara, kërkimin e saj për transferimin e detyrueshëm të domain. Hertz. Al, gjykata e gjen të bazuar në nenin 30 të rregullores.

Bazuar në nenin 184/b të ligjit Nr.9947, datë 07.07.2008 "Për pronësinë industriale", i ndryshuar, Gjykata gjen të bazuar kërkesën e palës paditëse për publikimin e vendimit të gjykatës me shpenzimet e palës së paditur, publikim i cili do të kryhet brenda 15 ditëve nga dita që vendimi do të marrë formë të prerë, në gazetën me tirazhin më të madh në vend, në çastin e ekzekutimit të vendimit, me objekt veprimtarie të ngjashme me atë të palës paditëse.