SHOQËRIA “X” Shpk KUNDËR R.R &D.P.P.M, VENDIMI Nr. 4211, datë 18.05.2016, PËR KONSTATIMIN E KONKURRENCËS SË PANDERSHME, NDALIMIN E PËRDORIMIT TË PAAUTORIZUAR TË MARKËS TREGTARE “ZGARA KORÇARE” DHE SHPËRBLIM DËMI JOPASUROR.
Objekti: Konstatimin e konkurrencës së pandershme nëpërmjet përdorimit të paautorizuar të
markës tregtare “ZGARA KORÇARE” nga pala e paditur. Ndalimin e përdorimit të paautorizuar
të Markës Tregtare “ZGARA KORÇARE” në qarkullimin tregtar nga pala e paditur.
Shpërblimin e dëmit jopasuror në shumën 100.000 lekë. Shpenzimet gjyqësore në ngarkim të
palës së paditur.
Gjyqtari: T.H
Fjalët kyç:
Markë tregtare, përdorim i paautorizuar, cenim i të drejtave të pronësisë mbi markën tregtare, ndalim përdorimi të paautorizuar, dëmshpërblim dëmi moral, e drejtë ekskluzive përdorimi, markë e regjistruar, ngjashmëri identike, konfuzion te konsumatori, reputacion i markës, praktika tregtare, konkurencë e pandershme.
Ligji dhe dispozitat ligjore përkatëse: Neni 10 bis pika 3 Konventa e Parisit 1883, Nenet e Kodit Civil, Neni 167 pika “b” të ligjit Nr.9947 07.07.2008 “Për Pronësinë Industriale”, Vendimi Unifikues i Gjykatës së Lartë Nr.12, datë 14.09.2007.
Faktet kryesore:
Pala paditëse Shoqëria “X” sh.p.k është një shoqëri e së drejtës shqiptare dhe e ushtron veprimtarinë e distribucionit dhe eksport-import të artikujve te ndryshëm ushqimore, industriale, pijeve alkolike, publikim i mediave te shkruara, revista të ndryshme.
Në funksion të ushtrimit të veprimtarisë së saj dhe për nevoja të aktivitetit tregtar, shoqëria “X” sh.p.k ka regjistruar Markën Tregtare “ZGARA KORÇARE” në D.P.P.M., depozituar me datë 17 Dhjetor 2012, me numër regjistrimi kombëtar 14915, datë rregjistrimi 28 Qershor 2013.
Nëpërmjet kërkesë-padisë së paraqitur pala paditëse ka parashtruar se pas regjistrimit të markës tregtare në pronësi të saj është vënë në dijeni prej disa muajsh për përdorimin e markës tregtare “ZGARA KORÇARE” në territorin shqiptar nga subjekte të paautorizuar prej saj.
Një ndër këto subjekte sipas palës paditëse është aktiviteti që ushtron i padituri R.R., i cili sipas ekstraktit të QKR, datë 29.02.2016 rezulton i regjistruar si Person Fizik (tregtar) me Nipt L31916008D me objekt veprimtarie “Qebaptore” dhe emër tregtar “ZGARA IME”, por sipas palës paditëse në vendin e aktivitetit të tij ka afishuar tabelën “ZGARA KORÇARE” që është njëkohësisht marka tregtare në pronësi të palës paditëse.
Në datën 24 Nëntor 2015 shoqëria “X” sh.p.k, i është drejtuar palës së paditur R.R., duke kërkuar ndalimin e përdorimit të paautorizuar të markës “ZGARA KORÇARE” në qarkullimin tregtar, si mbajtës i së drejtës për markën tregtare duke i lënë një afat 30 ditor për njoftimin e pushimit të cënimit, por pala paditëse nuk ka kryer asnjë veprim në këtë drejtim.
Mbrojtja pretendon pranimin e padisë, pala e paditur u gjykua në mungesë.
Vendimi:
Gjykata konstaton kryerjen e veprimeve që cënojnë të drejtat e pronësisë mbi markën tregtare “ZGARA KORÇARE” nga i padituri dhe në përputhtje me nenin 167 pika “b” të ligjit Nr.9947 07.07.2008 “Për Pronësinë Industriale” urdhëron ndalimin e veprimeve të tjera në shkelje të të drejtave dhe heqjen ose bllokimin e objekteve (tabelave), që përbëjnë shkelje të të drejtave të markës tregtare.
Arsyetimi i gjykatës:
Marka tregtare “ZGARA KORÇARE” është regjistruar me numër regjistrimi kombëtar 14915 me datë regjistrimi 17 Dhjetor 2012, në përputhje me pikën 1, 2 (germat “a”, “d”) të nenit 140 si dhe pikës 3 të tij pasi është paraqitur në formë grafike, si fjalë dhe kombinim ngjyrash. Marka tregtare e regjistruar, përmban elementët thelbësorë me karakter dallues për ta diferencuar dhe për të arritur tek konsumatori me synimin që ky i fundit të mund të dallojë këtë markë nga një tjetër.
Qëllimi i markës tregtare është krijimi i një përqasjeje të konsumatorit ose me saktë lidhja që vjen midis markës dhe produktit që ai tregon, e përkthyer më pas në reputacion të saj në qarkullimin tregtar.
Mallrat që ofrohen nga palët ndërgjyqëse janë të njëjta dhe, në këto kushte, sjellin konfuzion tek konsumatori. I padituri R.R., rezulton të jetë përdorues i paautorizuar i Markës tregtare “ZGARA KORÇARE”, pavarësisht faktit që nga ekstrakti i QKR-së pala e paditur ka deklaruar emërtim tregtar “ZGARA IME”. Pala e paditur e ka përdorur dhe vijon ta përdorë markën në aktivitetin e saj në treg, megjithëse pala paditëse i është drejtuar me shkresë për ndalimin e përdorimit të saj. Për sa kohë që pala e paditutur, tregton të njëjtin shërbim sikundër dëshmohet nga fotot e administruara në cilësinë e provës dhe megjithëse është në dijëni për pronësinë e kësaj marke, vijon ta përdorë markën sa kohë që tregton të njëjtin shërbim sikundër dëshmohet nga fotot e administruara në cilësinë e proves, ku shihet vendosja e tabelës në adresën që sipas edhe ekstraktit të QKR, është adresa e vendit të ushtrimit të veprimtarisë tregtare nga i padituri R.R.
Mallrat që ofrohen nga palët ndërgjyqëse janë të njëjta dhe në këto kushte sjellin konfuzion tek konsumatori. Gjatë hetimit gjyqësor rezultoi se pala e paditur ka përdorur markën nëpërmjet ushtrimit të aktivitetit tregtar dhe reklamimit të markës në pronësi të palës paditëse duke shkelur të drejtat mbi markën “ZGARA KORÇARE”, markë e mbrojtur ligjërisht.
Nenit 10 bis pika 3 Konventa e Parisit 1883 detyron vëndet anëtare të ndalojnë të gjitha veprimet që bien ndesh me praktika tregtare të tilla sa konfuzioni merret i mirëqënë, gjendje kjo që krijon mbrojtje të gjerë përfshirë markën tregtare, shenjat dalluese, etiketat, shfaqjet ambalazhuese, formë ose ngjyrë të mallrave, apo çdo tregues tjeter të mallrave që përdoret nga një biznesmen.
Nga provat dhe debati i zhvilluar në proçesin gjyqësor rezulton e provuar lidhja shkakësore materiale ndërmjet sjelljes së paligjshme (veprimit a mosveprimit) e me faj të personit fizik tregtar R.R dhe dëmit të shkaktuar. Këto veprime konsiderohen të kryera me faj, pasi siç është konstatuar në proces i padituri ka pasur vullnetin për të përfituar ekonomikisht duke e reklamuar markën tregtare të mbrojtur në ambientet e aktivitetit të tij tregtar dhe nuk ka vepruar për ta ndalur këtë as pasi pronari i kësaj marke, “X” Sh.p.k e ka njoftuar për të drejtat e mbrojtura mbi të. Këto veprime të të paditurit kanë sjellë si pasojë cenimin e emrit të mirë tregtar “ZGARA KORÇARE”, duke i sjellë dëme ekonomike pronarit të saj, shoqërisë “X” shpk.
Në kushtet e mësipërme, gjykata konstaton kryerjen e veprimeve që cënojnë të drejtat e pronësisë mbi markën tregtare “ZGARA KORÇARE” nga i padituri dhe në përputhtje me nenin 167 pika “b” të ligjit Nr.9947, datë 07.07.2008 “Për Pronësinë Industriale” urdhëron ndalimin e veprimeve të tjera në shkelje të të drejtave dhe heqjen ose bllokimin e objekteve (tabelave), që përbëjnë shkelje të të drejtave të markës tregtare.
Pala paditëse ka kërkuar në objektin e padisë edhe një vlerë si dëmshpërblim për dëmin jo pasuror 100.000 lekë, ardhur si pasojë e përdorimit të pautorizuar dhe shkeljen e së drejtës mbi markën dhe konkurrencën e pandershme. Ky kërkim gjen mbështetje në ligjin e posaçëm, nenet 184/b dhe 184/c dhe në dispozitat e Kodit Civil, nenet 608, 625, ashtu edhe në praktikën Unifikuese të Gjykatës së Lartë, sipas Vendimit Nr.12, datë 14.09.2007.