ألبانيا

VENDIM Nr. 501, datë 29.8.2018

PËR MIRATIMIN E RREGULLORES PËR EKSPERTËT E OBJEKTEVE TË PRONËSISË INDUSTRIALE

Në mbështetje të nenit 100 të Kushtetutës dhe të neneve 198/b, 198/c, 198/ç dhe 202, të ligjit nr. 9947, datë 7.7.2008, “Për pronësinë industriale”, të ndryshuar, me propozimin e ministrit të Financave dhe Ekonomisë, Këshilli i Ministrave

VENDOSI:

1. Miratimin e rregullores për ekspertët e objekteve të pronësisë industriale, sipas tekstit që i bashkëlidhet këtij vendimi dhe është pjesë përbërëse e tij.

2. Ngarkohet Drejtoria e Përgjithshme e Pronësisë Industriale për zbatimin e këtij vendimi. Ky vendim hyn në fuqi pas botimit në Fletoren Zyrtare.

KRYEMINISTRI Edi Rama

RREGULLORE PËR EKSPERTËT E OBJEKTEVE TË PRONËSISË INDUSTRIALE

Neni 1 Qëllimi

Kjo rregullore ka për qëllim përcaktimin e rregullave dhe procedurave të regjistrimit për ekspertët e objekteve të pronësisë industriale (në vijim, PI), të cilët licencohen nga Drejtoria e Përgjithshme e Pronësisë Industriale.

Neni 2 Ekspertët e objekteve

të pronësisë industriale

1. Ekspertët e PI-së, janë: a) Ekspertët për patentat e shpikjeve dhe modelet e përdorimit; b) Ekspertët për disenjot industriale, markat tregtare dhe treguesit gjeografikë. 2. Kandidati që kërkon të licencohet si ekspert për patentat e shpikjeve dhe modelet e përdorimit duhet

të depozitojë dokumentacionin e nevojshëm pranë komisionit të vlerësimit të DPPI-së, si më poshtë vijon: a) Kërkesën për licencim si ekspert i PI-së për patentat e shpikjeve dhe modelet e përdorimit; b) Jetëshkrimin; c) Pagesën e tarifës përkatëse për të marrë pjesë në testim; ç) Diplomën e ciklit të dytë të studimeve “Master shkencor” në fushën ku kërkohet ekspertizë; d) Çdo dokument tjetër që vërteton pjesëmarrjen në aktivitete me temën e pronësisë industriale, si dhe

njohuritë e posaçme në fushën e PI-së. 3. Kandidati që kërkon të licencohet si ekspert për disenjot industriale, markat tregtare dhe treguesit

gjeografikë duhet të depozitojë dokumentacionin e nevojshëm pranë komisionit të vlerësimit të DPPI-së, si më poshtë vijon:

a) Kërkesën për licencim si ekspert për disenjot industriale, markat tregtare dhe treguesit gjeografikë; b) Jetëshkrimin; c) Diplomën e noterizuar të ciklit të dytë të studimeve “Master shkencor”; ç) Pagesën e tarifës përkatëse për të marrë pjesë në testim. 4. Dokumenti i ekstraktit të regjistrimit të QKB-së do të sigurohet nga vetë komisioni i vlerësimit

të DPPI-së. 5. Ish-punonjësit e DPPI-së, që kanë jo më pak se 4 vjet eksperiencë pune në çështjet e pronësisë

industriale, që depozitojnë një kërkesë për t’u licencuar si ekspertë të PI-së, nuk i nënshtrohen testimit vlerësues.

6. Ish-anëtarët e bordit të apelit të DPPI-së, që kanë jo më pak se 2 vjet përvojë pune në këtë bord, që depozitojnë një kërkesë për t’u licencuar si ekspertë të PI-së, nuk i nënshtrohen testimit vlerësues.

7. Eksperti ka për detyrë kryerjen e ekspertizës në fushën e PI-së pranë çdo organi, ku kjo mund të kërkohet:

a) të japë shpjegime profesionale mbi objektet e PI-së përpara organit që e ka kërkuar si ekspert; b) të japë mendimin e specializuar përpara organit që kërkon ekspertizën në zgjidhjen e konflikteve me

objekt PI-në. 8. Eksperti duhet të kryejë detyrat e marra: a) duke iu përmbajtur dispozitave ligjore dhe duke respektuar kodin e etikës profesionale; b) duke siguruar fshehtësinë e të dhënave që i janë besuar si ekspert; c) duke respektuar rregullat procedurale, përfshirë dhe ato të procedurave gjyqësore. 9. Eksperti ka të drejtë të heqë dorë nga ekspertimi në çdo kohë, nëse paraqet me shkrim arsyet e

ligjshme të dorëheqjes apo pamundësinë fizike të justifikuar.

Neni 3 Komisioni i vlerësimit

1. Komisioni i vlerësimit funksionon si një strukturë e ngritur brenda DPPI-së, për licencimin e ekspertëve të PI-së, në përputhje me parashikimet e nenit 193/ç, të ligjit nr. 9947, datë 7.7.2008, “Për pronësinë industriale”.

2. Komisioni i shqyrton kërkesat një herë në 3 muaj dhe vendos për datën kur zhvillohet testimi. Data e zhvillimit të testimit caktohet jo më shumë se 1 (një) muaj nga shqyrtimi i kërkesave.

3. Drejtori i Përgjithshëm i DPPI-së urdhëron krijimin e komisionit të vlerësimit të ekspertëve të PI- së, të përbërë nga tre punonjës të DPPI-së, si anëtarë të komisionit, njëri nga të cilët emërohet kryetar.

4. Kryetari cakton një nga anëtarët e komisionit të mbajë dokumentet e kandidatëve, si dhe të kryejë veprimet shkresore deri në përfundim të procedurës së licencimit.

5. Komisioni i shqyrton kërkesat për përfaqësues një herë në 3 muaj dhe vendos për datën e zhvillimit të testimit.

6. Testimi vlerësues për ekspertët e PI-së bëhet me shkrim. 7. Tezat e testimit vlerësues i përgatit komisioni i vlerësimit. 8. Kandidati, që ka plotësuar dokumentacionin e nevojshëm për të marrë pjesë në testim, lajmërohet

nga komisioni me anë të postës elektronike/telefonit për vendin, datën dhe orën kur do të zhvillohet testimi.

9. Nëse kandidati nuk plotëson dokumenta-cionin e nevojshëm për të marrë pjesë në testim, njoftohet që, brenda 5 ditëve nga njoftimi, të plotësojë dokumentacionin, në të kundërt, kërkesa e tij për të marrë pjesë në testim refuzohet.

10. Komisioni i vlerësimit, brenda 30 ditëve nga data e testimit kualifikues, njofton kandidatët që i janë nënshtruar testimit nëse janë kualifikuar apo jo.

11. Kandidatët e kualifikuar ftohen të kryejnë pagesën e licencimit brenda 30 (tridhjetë) ditëve nga data e njoftimit.

12. Kandidatët e kualifikuar, që kryejnë pagesën brenda afatit të parashikuar në pikën 11 të këtij neni, pajisen nga DPPI-ja me licencën e përfaqësuesit të autorizuar të PI-së brenda 15 ditësh nga data e pagesës.

13. Nëse kandidati nuk paguan pagesën në afat, komisioni i vlerësimit e rrëzon kërkesën për ekspert

dhe njofton kandidatin. 14. Të drejtën e ushtrimit të profesionit si ekspertë të PI-së e kanë vetëm personat, të cilët janë të

pajisur me licencë nga DPPI-ja, e cila përmban: a) Emrin e ekspertit; b) Numrin e ekspertit në regjistrin e ekspertëve të PI-së; c) Llojin e objektit të pronësisë industriale për të cilën licencohet; ç) Datën e regjistrimit në regjistër. 15. Licenca nënshkruhet nga drejtori i Përgjithshëm i DPPI-së. 16. Për marrjen e licencës paguhet tarifa e parashikuar në vendimin nr. 883, datë 13.5.2009, të

Këshillit të Ministrave, “Për miratimin e tarifave për regjistrimin e objekteve të PI-së”.

Neni 4 Regjistri i ekspertëve të PI-së

1. E drejta për ushtrimin e veprimtarisë të ekspertit të PI-së fitohet me regjistrimin e tij në regjistër dhe më dhënien e certifikatës nga DPPI-ja.

2. Regjistri i ekspertëve të PI-së përmban: a) Ekspertët e patentave të shpikjes dhe modeleve të përdorimit; b) Ekspertët për disenjot industriale, markat tregtare dhe treguesit gjeografikë; c) Numrin e ekspertit të PI-së në regjistër; ç) Datën e regjistrimit në regjistër; d) Datën e regjistrimit të ndryshimeve në regjistër; dh) Datën e çregjistrimit nga regjistri; e) Ekstraktin e përftuar nga regjistri i ekspertëve të PI-së që lëshohet nga komisioni i vlerësimit i

DPPI-së me firmë të drejtorit të Përgjithshëm. 3. Ekspertët e PI-së, për t’u regjistruar në regjistër, duhet të kenë kaluar testimin për ekspertë dhe

të kenë bërë pagesën për marrjen e licencës. 4. Regjistrimi në regjistrin e ekspertëve të PI-së bëhet çdo vit para skadimit të afatit njëvjeçar të

ripërtëritjes, sipas pikës 7, të nenit 198/c, të ligjit nr. 9947, datë 7.7.2008, “Për pronësinë industriale”, kundrejt tarifës për ripërtëritje e parashikuar në vendimin nr. 883, datë 13.5.2009, të Këshillit të Ministrave, “Për miratimin e tarifave për regjistrimin e objekteve të PI-së”. Nëse përfaqësuesi nuk kryen pagesën e ripërtëritjes brenda afatit, atij i humbet e drejta e përfshirjes në regjistrin e përfaqësuesve të autorizuar. Kjo e drejtë rifitohet pas kryerjes së pagesës së ripërtëritjes nga përfaqësuesi. Me kryerjen e pagesës nga përfaqësuesi, kryhet përditësimi dhe ripërfshirja e tij në regjistrin e përfaqësuesve të autorizuar.

5. Nëse eksperti i PI-së nuk e ushtron aktivitetin tregtar për një periudhë 5-vjeçare, licenca nuk ripërtërihet dhe eksperti duhet t’i nënshtrohet edhe një herë testimit për marrjen e licencës.

6. Licenca e ekspertit të PI-së ripërtërihet çdo vit, pa testim, kundrejt tarifës së pagesës përkatëse.

Neni 5 Shënimi i ndryshimeve në regjistër

Në rastin kur eksperti kërkon ndryshimin e adresës ose të të dhënave të tjera, ai duhet të paraqesë kërkesë për pasqyrimin e këtyre ndryshimeve në regjistër dhe të bëjë pagesën e tarifës së parashikuar në vendimin nr. 883, datë 13.5.2009, të Këshillit të Ministrave, “Për miratimin e tarifave për regjistrimin e objekteve të PI-së”.

Neni 6 Publikimet

1. Zyra do të publikojë regjistrin e ekspertëve dhe të gjitha ndryshimet e bëra në regjistër, në faqen web të DPPI-së dhe në buletinin e saj zyrtar.

2. DPPI-ja i publikon ekspertët e PI-së në format elektronik në faqen zyrtare të saj, vetëm pasi të ketë verifikuar që kandidati për ekspert të jetë regjistruar për lejimin e ushtrimit të aktivitetit tregtar.

3. Publikimi në faqen zyrtare të DPPI-së do të bëhet kundrejt pagesës së tarifës përkatëse të parashikuar në vendimin nr. 883, datë 13.5.2009, të Këshillit të Ministrave, “Për miratimin e tarifave për regjistrimin e objekteve të PI-së”.