Vazirlar Mahkamasining 2003 yil 1 iyuldagi 298-son qaroriga 1-ilova
O'zbekiston Respublikasi Davlat Patent idorasining Appellatsiya kengashi to'g'risida
NIZOM
І.Umumiy qoidalar
1.Ushbu nizom “Ixtirolar, foydali modellar va sanoat namunalari va sanoat namunalari to‘g‘risida”, “Seleksiya yutuqlari to‘g‘risida”,“Integral mikrosxemalar topologiyalarini huquqiy muhofaza qilish to‘g‘risida” hamda“Tovar belgilari, xizmat ko‘rsatish belgilari va tovar kelib chiqqan joy nomlari to‘g‘risida” gi O‘zbekiston Respublikasi qonunlariga muvofiq O‘zbekiston Respublikasi Davlat patent idorasining Apellatsiya kengashi (keyingi o‘rinlarda Apellatsiya kengashi deb ataladi) vakolatlarini, uning faoliyatini tashkil etish tartibini belgilaydi.
2.Apellatsiya kengashi o‘z faoliyatini O‘zbekiston Respublikasi Davlat patent idorasining (keyingi o‘rinlarda Patent idorasi deb ataladi) ixtirolar, foydali modellar va sanoat namunalarini, seleksiya yutuqlarini, integral mikrosxemalar topologiyalarini, tovar belgilar, xizmat ko‘rsatish belgilari va tovar kelib chiqqan joy nomlarini huquqiy muhofaza qilish bilan bog‘liq apellatsiyalarni sudgacha ko‘rib chiquvchi kollegial organi sifatida amalga oshiradi.
3.Apellatsiya kengashi qarorlar qabul qilishda mustaqil hisoblanadi va o‘z faoliyatida O‘zbekiston Respublikasi qonun hujjatlariga,O‘zbekiston Respublikasining intellektual mulkni muhofaza qilishga doir xalqaro shartnomalariga, mazkur Nizomga amal qiladi.
II.Apellatsiya kengashining vakolatlari
4.Apellatsiya kengashi a) Patent idorasining talabnoma berilgan: sanoat mulki obyektlari; seleksiya yutuqlari; integral mikrosxemalar topologiyalari; tovar belgilari, xizmat ko‘rsatish belgilari va tovar kelib chiqqan joy nomlariga nisbatan qabul qilingan qarorlari yuzasidan apellatsiyalarni ko‘rib chiqadi; b) manfaatdor yuridik va jismoniy shaxslarning: sanoat mulki obyektlariga; seleksiya yutuqlariga patent berilishi yuzasidan apellatsiyalarini ko‘rib chiqadi; v) manfaatdor yuridik va jismoniy shaxslarning integral mikrosxemalar topologiyalarining ro‘yxatdan o‘tkazilishi yuzasidan apellatsiyalarini ko‘rib chiqadi; g) manfaatdor yuridik va jismoniy shaxslarning:sanoat mulki obyektlarigava seleksiya yutuqlariga berilgan patentlarning haqiqiyligi; O‘zbekiston Respublikasi hududida belgining xalqaro ro‘yxatdan o‘tkazilishining amal qilishi yuzasidan apellatsiyalarini ko‘rib chiqadi; d) quyidagilarning: integral mikrosxemalar topologiyalarini ro‘yxatdan o‘tkazish to‘g‘risidagi guvohnomalarning;tovar belgilari, xizmat ko‘rsatish belgilariga berilgan, tovar kelib chiqqan joy nomlaridan foydalanish huquqiga berilgan guvoxnomalarning amal qilishi to‘xtatilishi yuzasidan apellatsiyalarini ko‘rib chiqadi; ye) tovar kelib chiqqan joy nomi ro‘yxatdan o‘tkazilishi bekor qilinishi yuzasidan apellatsiyalarni ko‘rib chiqadi; j) tovar belgilari, xizmat ko‘rsatish belgilarining O‘zbekiston Respublikasida umum e’tirof etilgan deb tan olinishi yuzasidan apellatsiyalarini ko‘rib chiqadi.
5. Apellatsiya kengashi apellatsiya ko‘rib chiqilishi munosabati bilan: apellatsiya bergan shaxslardan, shuningdek boshqa manfaatdor shaxslardan apellatsiyani ko‘rib chiqish uchun zarur bo‘lgan qo‘shimcha materiallar va ma’lumotlarni surab olishga; qo‘shimcha ekspertiza tayinlash, uni o‘tkazish uchun mustaqil ekspert va maslahatchilarni jalb etish; Patent idorasi ixtiyoridagi patent hujjatlari va ilmiy-texnika adabiyotlari davlat fondlaridan foydalanish huquqiga egadir.
ІІІ. Apellatsiya kengashi tarkibi va uni shakllantirish tartibi
6. Apellatsiya kengashi Kengash raisi, uning o‘rinbosari, kengash a’zolari va kotibidan iborat tarkibda faoliyat ko‘rsatadi. Patent idorasining direktori Apellatsiya kengashi raisi hisoblanadi. Apellatsiya kengashi tarkibiga Patent idorasi direktorining o‘rinbosarlari, Patent idorasining eng malakali va tajribali xodimlari, shuningdek mustaqil omillar va mutaxassislar kiradi. Apellatsiya kengashining shaxsiy va son tarkibi Patent idorasi direktorining buyrug‘i bilan tasdiqlanadi.
7. Apellatsiya kengashi raisi, uning topshirig‘iga ko‘ra esa – uning o‘rinbosari Apellatsiya kengashining faoliyatini tashkil etadi.
8. Apellatsiya kengashida ishlar kengash kotibi tomonidan yuritiladi. Apellatsiya kengash kotibi Apellatsiya kengashi tomonidan qarorlar qabul qilishda ovoz berish huquqiga ega emas.
ІV. Apellatsiya kengashi faoliyatini tashkil etish
9. Apellyayiya kengashi faoliyati majlislar o‘tkazish yo‘li bilan tashkil etiladi. Majlislar zaruriyatga ko‘ra Apellatsiya kengashi raisi tomonidan, u bo‘lmagan taqdirda esa uning o‘rinbosari tomonidan chaqiriladi. Apellatsiya kengashi majlisida protokol yuritiladi, uni Apellatsiya kengashi raisi va kotibi imzolaydi.
10. Apellatsiya kengashi majlislarida apellatsiya bergan shaxs yoki uning vakili, boshqa manfaatdor yuridik yoki jismoniy shaxslar qatnashishga haqlidirlar. Apellatsiya bergan shaxs va ko‘rib chiqilayetgan ish bo‘yicha tomonlar hisoblangan boshqa shaxslar majlis bo‘lishidan kamida o‘n kun oldin majlis o‘tkaziladigan joy, sana va vaqt to‘g‘risida yozma ravishda xabardor qilinishi kerak.
Apellatsiya bergan shaxs boshqa manfaatdor shaxslar iltimosnomasiga binoan Apellatsiya kengashi majlisi kengash qaroriga ko‘ra kechroq, lekin olti oydan ko‘p bo‘lmagan muddatga ko‘chirilishi mumkin. Bunda apellatsiyalarni ko‘rib chiqishning balgilangan muddatining o‘tishi Apellatsiya kengashi majlisining yangi sanasigacha to‘xtatib turiladi.
11. Intellektual mulk obyektiga huquqiy muhofaza berish to‘g‘risidagi talabnomani ko‘rib chiqishda va uning bo‘yicha ekspertiza o‘tkazishda ishtirok etgan Apellatsiya kengashi a’zolari xulosa berish yoki Apellatsiya kengashining mazkur intellektual mulk obyekti bilan bog‘liq apellatsiyalar ko‘rib chiqilayotgan majlisida qatnashish huquqiga ega emas.
12. Qo‘shimcha materiallar va ma’lumotlar zarur bo‘lgan taqdirda ular Apellatsiya kengashi tomonidan belgilangan muddatlar taqdim etilishi kerak. Apellatsiya bergan shaxs va boshqa manfaatdor shaxslar iltimosnomasiga ko‘ra qo‘shimcha materiallar va ma’lumotlarni taqdim etish muddati Apellatsiya kengashi tomonidan uch oydan ortiq bo‘lmagan muddatga uzaytirilishi mumkin. Bunda apellatsiyalarni ko‘rib chiqish belgilangan muddatining o‘tishi uzaytirish muddatigacha to‘xtatilib turiladi.
13. Apellatsiyalar berish va ularni Apellatsiya kengashi tomonidan ko‘rib chiqish qoidalari Patent idorasi tomonidan tasdiqlanadi.
14. Apellatsiyalarni ko‘rib chiqish natijalari bo‘yicha Apellatsiya kengashi apellatsiyalarni qanoatlantirish, qisman qanoatlantirish yoki apellatsiyalarni qanoatlantirishni rad etish to‘g‘risida qarorlar qabul qiladi.Apellatsiya kengashi qabul qilingan qarorlarning asolanganligini va qonuniyligini ta’minlaydi.
Tovar kelib chiqqan joy nomini ro‘yxatdan o‘tkazishni bekor qilish to‘g‘risida qaror qabul qilingan taqdirda Apellatsiya kengashi ayni paytda ushbu ro‘yxatdan o‘tkazish bilan bog‘liq bo‘lgan tovar kelib chiqqan joy nomidan foydalanish huquqiga berilgan guvohnomalarning amal qilinishini muddatidan oldin to‘xtatish to‘g‘risida qaror qabul qiladi.Apellatsiya kengashi qarori yuzasidan qabul qilingan sanadan boshlab olti oy mobaynida sudga shikoyat qilinishi muikin.
15. Apellatsiya kengishi qarorlari qabul qilingan kundan boshlab besh kun mobaynida apellatsiya bergan shaxslarga va boshqa manfaatdor shaxslarga yuboriladi, shuningdek Patent idorasining rasmiy nashrida e’lon qilinadi.
16. apellatsiya kengashi faoliyatini moliyalashtirish apellatsiyalarni ko‘rib chiqish bo‘yicha yuridik ahamiyatga ega bo‘lgan harakatlarni amalga oshirganlik uchun undiriladigan patent bojlari hisobiga amalga oshiriladi. Patent bojlari Patent idorasiga to‘lanadi.Patent bojlari miqdori, ularni to‘lash muddatlari, shuningdek ulardan foydalanish tartibi O‘zbekiston Respublikasi vazirlar Mahkamasi tomonidan belgilanadi.