I PANDEHUR XX, VENDIMI PENAL NR. 2189, DATË 01.10.2019, I AKUZUAR PËR KRYERJEN E VEPRËS PENALE “SHKELJA E TË DREJTAVE TË PRONËSISË INDUSTRIALE”, PARASHIKUAR NGA NENI 149/A I KODIT PENAL TË REPUBLIKËS SË SHQIPËRISË. 1 Gjyqtari: G.H
Fjalët kyç:
Shkelja e të drejtave të pronësisë industriale, markë e mbrojtur, licencë, autorizim i pronarit.
Ligji dhe dispozitat ligjore përkatëse: Nenet 149/a, 63 të Kodit Penal, si dhe nenet 403, 405 të Kodit të Procedurës Penale.
Faktet kryesore:
Më datë 11.12.2018 Seksioni për Krimin Ekonomik dhe Financiar pranë Drejtorisë Vendore të Policisë Tiranë, në bashkëpunim me inspektorët e hetimit tatimor kanë kryer kontroll pranë dyqanit të të pandehurit ***, nga ka rezultuar se në këtë ambjent të marrë me qera nga ky shtetas ndodheshin disa artikuj si çanta dhe portofola të markave të njohura. Të pandehurit i është kërkuar të paraqesë liçencën për tregtimin e këtyre artikujve, siç parashikon ligji për markat e mbrojtura, por ai u ka vendosur në dispozicion disa fatura tatimore, ku vërtetohej se këto mallra i kishte blerë prane disa subjekteve të tjera. Artikujt që i janë gjetur të pandehurit nuk kanë qenë të shoqëruara me dokumentacionin përkatës ligjor, për mbrojtjen e markave, me pëlqimin ose autorizimin e pronarit të këtyre markave.
Mbi bazën e këtij fakti, Prokuroria e Rrethit Gjyqësor Tiranë ka regjistruar dhe më pas ka dërguar për gjykim çështjen penale në ngarkim të të pandehurit ***, i akuzuar për kryerjen e veprës penale “Shkelja e të drejtave të pronësisë industriale”, parashikuar nga neni 149/a i Kodit Penal të Republikës së Shqipërisë.
Prokurori pretendoi se: në analizë të fakteve dhe provave provohet se i pandehuri ka konsumuar plotësisht elementët e veprës penale “Shkelja e të drejtave të pronësisë industriale”, parashikuar nga neni 149/a i Kodit Penal të Republikës së Shqipërisë.
I pandehuri pretendoi se: veprën penale e kishte kryer nga padijenia për ligjin penal, se ishte i penduar dhe kërkoi një dënim më të butë.
Vendimi:
Gjykata e Rrethit Gjyësor Tiranë në përfundim të gjykimit vendosi deklarimin fajtor të të pandehurit *** për kryerjen e veprës penale “Shkelja e të drejtave të pronësisë industriale“, parashikuar nga neni 149/a i Kodit Penal. Duke qenë se, i pandehuri u procedua me gjykim të shkurtuar, bazuar në nenin 406 të Kodit të Procedurës Penale, i ulet 1/3 (një e treta) e dënimit dhe përfundimisht i pandehuri *** dënohet me *** ditë burgim. Në aplikim të nenit 63 të Kodit Penal, urdhërohet pezullimi i ekzekutimit të dënimit me burgim dhe zëvendësimin e tij me detyrimin e të pandehurit *** të përmbushë një punë në interes publik për një kohë prej *** orësh. Kjo punë duhet të përfundojë brenda një periudhe prej 6 (gjashtë) muajsh. Gjatë kësaj periudhe i pandehuri do të mbajë kontakte me Shërbimin e Provës Shpenzimet gjyqësore i ngarkohen të pandehurit. Për sa i përket llojit dhe masës së dënimit Gjykata çmoi se, duhen mbajtur parasysh këto rrethana si: rrezikshmërina relativisht e ulët te veprës penale, parashikuar nga neni 149/a i Kodit Penal, për të cilën ligjvënësi ka parashikuar një dënim gjer në një vit burgim, duke e konsideruar si kundërvajtje dhe jo krim; faktin se, i pandehuri është treguar bashkëpunues me organet e ndjekjes penale që në momentin e parë; faktin se, sasia e mallrave të kapura është e vogël; faktin se, i pandehuri është kryefamiljar, me arsim të lartë dhe ka persona në ngarkim. Sipas vërtetimit të gjendjes gjyqësore rezulton se, i pandehuri *** është i padënuar më parë.
Në këto kushte Gjykata, në vështrim të neneve 47-50 të K. Penal çmoi se, rrethanat e mësipërme në të cilat është kryer vepra penale, në kompleksitet, nuk janë lehtësuese për të pandehurin *** dhe nuk justifikojnë izolimin e tij nga shoqëria por një masë dënimi alternativ.
Arsyetimi i gjykatës:
Në nenin 149/a të Kodit Penal të Republikës së Shqipërisë, ligjvënësi ka parashikuar një mbrojtje të posaçme juridike për garantimin e të drejtave të pronësisë industriale. Veprimet e shtetasve në kundërshtim me këto rregulla janë objekti i këtyre veprave penale dhe passjellin përgjegjësi penale. Këto veprime, për t’u cilësuar si vepër penale nga ligji, duhet që: nga ana objektive kjo vepër të kryhet me anë të prodhimit, shpërndarjes, mbajtjes për qëllime tregëtimi, shitjes, ofrimit për shitje, furnizimit, shpërndarjes, eksportimit ose importimit për qëllime të parashikuara nga gërmat a) – ç) të nenit 149/a të KP; subjekti i kësaj vepre penale duhet të ketë mbushur moshën për përgjegjësi penale (16 vjeç) dhe të jetë i përgjegjshëm; nga ana subjektive, kjo vepër penale kryhen me dashje. Qëllimi parashikuar në dispozitë është element cilësues i veprës penale. Në rastin konkret, i pandehuri i ka konsumuar elementët e veprës penale për të cilën akuzohet.
1. Të dhënat e vendimit janë anonimizuar automatikisht nga programi kompjuterik i përdorur nga gjykata.